Er Rational musings #538

Er Rational musings #538



...बऱ्याच वर्षांपासून शेगाव ला जातोय. दरवर्षी, नित्यनियमाने, न चुकता.



रात्री ची विदर्भ एक्सप्रेस सीएसटी वरून पकडायची, मजेत जेवण करायचे, ताणून द्यायची, कि पहाटे डायरेक्ट शेगाव. टांगा / रिक्शा पकडून भक्त निवास, प्रातर्विधी, आंघोळी, स्वच्छ कपडे घालून, दर्शन. अक्षरशः क्विक फायर, पण निवांत दर्शन. इतकं स्वच्छ देवस्थान क्वचितच दूसरं कुठलं असेल. मग दिवस आपलाच. बाहेर येऊन गाड्यांवर नाश्ता हापसणे, व टाईमपास. पूर्वी मंदिर परिसरातच एक हाँटेल होतं सुधीर नावाचं, तिथे जगातली एकच नंबर, शेवेची भाजी मिळायची, चापून जेवायचं, लास्टला 'इंटरनँशनल' मधूर ताक! (काही वर्षांपासून मंदिर परिसरात फक्त पूजा साहित्य व प्रसाद मिळण्याची दूकानं ठेवली आहेत.) नंतर, भक्तनिवासात थोडा आराम, अडीच तीन नंतर, आनंद सागर. धमाल. तिथे काही बाही चरणं, संध्याकाळी भक्तनिवासात परतून, फ्रेश होऊन, तिथेच जेवण. रात्री परतीची विदर्भ, सकाळी ठाणे - मुलुंड.



दरवेळेसच मला प्रचंड चांगले अनुभव आले आहेत. विश्वास ठेवा.



गण गण गणात बोते...



दररोज म्हणा व अनुभूती घ्या...



।। श्री गजानन महाराज बावन्नी ।।



जय जय सद्गुरू गजानना । रक्षक तुची भक्तजना ।।१।।

निर्गुण तू परमात्मा तू । सगुण रूपात गजानन तू ।।२।।

सदेह तू परि विदेह तू । देह असूनि देहातीत तू ।।३।।

माघ वद्य सप्तमी दिनी । शेगांवात प्रगटोनी ।।४।।

उष्ट्या पत्रावळी निमित्त । विदेहत्व तव हो प्रगट ।।५।।

बंकटलालावरी तुझी । कृपा जाहली ती साची ।।६।।

गोसाव्याच्या नवसासाठी । गांजा घेसी लावुनी ओठी ।।७।।

तव पदतीथें वाचविला । जानराव तो भक्त भला ।।८।।

जानकीरामा चिंचवणे । नासवुनी स्वरूपी आणणे ।।९।।

मुकिन चंदुचे कानवले । खाऊनि कृतार्थ त्या केले ।।१०।।

विहिरीमाजी जलविहिना । केले देवा जलभरणा ।।११।।

मधमाश्यांचे डंख तुवा । सहन सुखे केले देवा ।।१२।।

त्यांचे काटे योगबले । काढुनि सहजी दाखविले ।।१३।।

कुस्ती हरिशी खेळोनी । शक्ती दर्शन घडवोनी ।।१४।।

वेद म्हणुनी दाखविला । चकित द्रविड ब्राम्हण झाला ।।१५।।

जळत्या पर्यकावरती । ब्रम्हगिरीला ये प्रचिती ।।१६।।

टाकळीकर हरिदासाचा । अश्व शांत केला साचा ।।१७।।

बाळकृष्ण बाळापूरचा । समर्थ भक्तचि जो होता ।।१८।।

रामदासरूपे त्याला । दर्शन देवुनि तोषविला ।।१९।।

सुकलालाची गोमाता । व्दाड बहू होती ताता ।।२०।।

कृपा तुझी होतांच क्षणी । शांत जाहली ती जननी ।।२१।।

घुडे लक्ष्मण शेगांवी । येता व्याधी तूं निरवी ।।२२।।

दांभिकता परि ती त्याची । तू न चालवूनि घे साची ।।२३।।

भास्कर पाटील तव भक्त । उध्दरिलासी तू त्वरीत ।।२४।।

आज्ञा तव शिरसा वंद्य । काकहि मानति तुज वंद्य ।।२५।।

विहिरीमाजी रक्षियला । देवां तु गणु जव-याला ।।२६।।

पितांबराकरवी लीला । वठला आंबा पल्लविला ।।२७।।

सुबुध्दी देशी जोश्याला । माफ करी तो दंडाला ।।२८।।

सवड्द येथील गंगाभारती । थुकुंनी वारिली रक्तपिती ।।२९।।

पुंडलिकांचे गंडांतर । निष्ठा जाणुनि केले दुर ।।३०।।

ओंकारेश्र्वरी फुटली नौका । तारी नर्मदा क्षणात एका ।।३१।।

माधवनाथा समवेत । केले भोजन अुच्छिष्ट ।।३२।।

लोकमान्य त्या टिळकांना । प्रसाद तूंची पाठविला ।।३३।।

कवर सुताची कांदा भाकर । भक्षिलीस त्वा प्रेमाखातर ।।३४।।

नग्न बैसुनी गाडीत । लिला दाविली विपरीत ।।३५।।

बायदे चित्ती तव भक्ती । पुंडलिकावर विरक्त प्रीती ।।३६।।

बापुना मनी विठ्ठल भक्ती । स्वये होशि तू विठ्ठल मूर्ती ।।३७।।

कवठ्याचा त्या वारक-याला । मरीपासूनी वाचविला ।।३८।।

वासुदेव यति तुज भेटे । प्रेमाची ती खुण पटे ।।३९।।

उध्दट झाला हवालदार । भस्मिभूत झाले घरदार ।।४०।।

देहांताच्या नंतरही । कितीजणा अनुभव येई ।।४१।।

पडत्या मजुरा झेलियले । बघती जन आश्र्चर्य भले ।।४२।।

अंगावरती खांब पडे । स्ञी वांचे आश्र्चर्य घडे ।।४३।।

गजाननाच्या अध्दत लीला । अनुभव येती आज मितीला ।।४४।।

शरण जाऊनी गजानना । दु:ख तयाते करि कथाना ।।४५।।

कृपा करि तो भक्तांसी । धावुनी येते वेगेसी ।।४६।।

गजाननाची बावन्नी । नित्य असावी ध्यानीमनी ।।४७।।

बावन्न गुरूवारी नेमे । करा पाठ बहू भक्तीने ।।४८।।

विघ्ने सारी पळती दूर । सर्वसुखाचा येई पुर ।।४९।।

चिंता साया दुर करी । संकटातूनी पार करी ।।५०।।

सदाचार रत सद् भक्ता । फळ लाभे बघता बघता ।।५१।।

सुरेश बोले जय बोला । गजाननाची जय बोला ।।५२।।



अनंतकोटी ब्रह्मांडनायक महाराजाधिराज योगीराज परब्रह्म सच्चिदानंद भक्तप्रतिपालक शेगांव निवासी समर्थ सद्गुरू श्री गजानन महाराज की जय ऽ ऽ



गेल्या वर्षी व ह्या वर्षी जायचं राह्यलय...

---

मिलिन्न्द काळे, 30th May 2016